وحشتينى يا مدونتى العزيزة
بجد بجد بجد ليكى وحشة
بداية الحمد لله الفيبراشن عدت تماااااااااااااام الحمد لله و بتقدير كمان ان شاء الله لو ينفع يعنى
المشكلة ان يوم 21 عدا من غير ما اخد بالى
فوجئت ان النهاردة 28 و أنا قايل ان انا جاى يوم 21
يمكن من فرحة ان انا خلصت جامعة الحمد لله
أى نعم ما زال القلق على النتيجة موجود لكن أدينى خلصت مرحلة مهمة فى حياتى
و من اليوم مفيش لا دروس و لا محاضرات(ده على أساس ان انا كنت بحضر محاضرات يعنى) الحمد لله خلصت
ان شاء الله لما النتيجة تطلع بس هبقى ألخص حياتى فى الجامعة و الدروس المستفادة منها لعل حد يتعظ و يخاف يدخل
هندسة!!!! لكن أنا عارف الناس و خاصة الواد اخوانى حتى النخاع أكيد عاوز برده يدخل هندسة
لكن بعد مذبحة الثانوية العامة دى أظن دفعة هندسة السنة اللى جاية هتكون 15 ولا 20 واحد كده
يااااااااااااااه ... دى تبقى حاجة جامدة جدااا
والمهندسين يقلوا فى السوق و نبدأ نبقى عملة نادرة بقا و كده
لا لا أكيد انا مش عاوز ده يحصل ربنا يكرم الناس كلها و خاصة اخوانى حتى النخاع لأنه هيضيف كتير لهندسة لما
يدخلها
اتكلمت عن اخوانى حتى النخاع كتير فى البوست ده يمكن عشان أكتر واحد كنت دايما بكلمه وقت الأمتحانات عشان
ضايفه على الميل و كده لكن لا يفوتنى ان أباركلك على النتيجة يا اخوانى على الملأ كده و أقولك
بارك الله لكما (اقصد لك) وبارك عليك و جمع بينك و بين الهندسة كمان 3 سنين يا رب
مفترق الطرق
طبعا الواحد دلوقتى على مفترق طرق و مش عارف أفكر ازاى أبدأ أظبت مشروعى كويس الأول ولا أبدأ أركز فى شغل كلية الهندسة
بالمناسبة
مشروعى ده
هو مشروع صغير كده بقاله سنة و نصف مكتب صغنطوط كده دعاية واعلان و مركز تصوير و طباعة وكده
الحمد لله المشروع شغال كويس جداا و مروقنا خالص لكن فى أخر شهرين مش كويسعشان مش متابعينه كويس
المشكلة الكبيرة ان شريكى الله يكرمه عملها و اتجنن و هيتجوز
و المفروض ان انا اللى أركز عشان أشيل الشغل
لكن المعضلة الكبرى
هل أركز فى المشروع ده و أديله جزء من وقتى لحد الجيش
ولا أبدأ انزل أشتغل فى الهندسة على طول
و لا أركز فى الكورسات
حاجة تتعب الأعصاب
مش كانت الدراسة أسهل
اللهم لا ترجعنا اليها مرة أخرى إلا للدراسات العليا
عموماً
أنا بدأت كورس انجليزى جامد قوى مع راجل زى العسل اسمه مستر عبد الله من غانا
و مظبتنا جداااا و أظن دى أول خطوة صح بعد التخرج أعملها ربنا بس يكملها على خير
دى كانت بس شوية حاجات داخلة فى بعضيها قلت أفضفض و أكتبها على المدونة
و ربنا يقدم لنا الخير حيث كان و نسأله أن يرضنا به
الصراحة مش فاضى أدور على صور وبتاع عشان احطها مع البوست
و هلزق البوست زى ما هوا كده بقا
No comments:
Post a Comment