الجن!!!!!.... مش فاهم
ايه الموضوع؟
اليوم حدثت أحداث المحلة و تابعت عن كثب ما حدث على كل وسائل الإعلام ,, وقد تناول برنامج العاشرة مساءً ما حدث بشئ من التفصيل
المهم
الكل بيسأل مين اللى عمل كده ! مين اللى ولع المحلة ! مين اللى حرق المدارس و المواصلات و ولع فى عربيات شرطة؟؟؟
مين اللى ضرب عساكر الأمن المركزى ؟؟؟
مين اللى ادا علقة سخنة ل 8 ضباط ؟؟؟
الكل يتساءل مين مين مين
يا عالم ركزوا بس شوية وانتو تعرفوا مين اللى ولع فى البلد
أنا بعد بحث طويل قدرت أعرف مين هما ,, أكيد هما و مين غيرهم يعنى
الجن
أيوه الجن ,,, أصل اللى الضيوف ميعرفهوش ان حكومة الحزن الوطنى كانت السبب فى ارتفاع الأسعار كمان عند اخواننا من الجن !!!!؟
أسعار؟ أيوه أسعار ,أمال انتو فاكرين الجن دول عايشين على قفه الحكومة
الحكومة بتبيع للجن كل حاجة حتى المازوت رغم ان المازوت حق شرعى للجن أمال هما هيتولعوا بإيه وهياخدو دش ازاى من غير نار محترمة
المهم ونظراً للزيادة الفظيعة فى أسعار المواد البترولية تحديدا فى السوق الجنى الكبير بوادى الجننة بالجمهورية كلها
وبعد خنقة حتى المردة من الجن من أحمد نظيف وشركاه
قرر الجن الإشتراك فى اعتصام 6 ابريل مع الناس فى المحلة
و حدثت الفاجعة؟؟؟
ضُرب الأمن من حيث لا يحتسبون
قامت حركة الجن المشهورة طبعا فى الوسط الجنى فقط المسماه (كفاية جننتونا) بدعوة كل فئات الشعب الجنى للمشاركة و بالفعل شاركوا بحماس و ادوا الأمن علقة سخنة أوى
هذا ما وصلنا عبر البريد الإلكترونى من أحد قادة حركة كفاية جننتونا الجنية
وسنوافيكم بباقى الأخبار تباعا
حد يسألنى طب ازاى الأمن معرفش لحد دلوقت ان الجن اللى عملوا كده
الإجابة سهلة جدا
الجن لسه محدش بيقدر يشوفهم
لكن احتمال قريب لما الأسعار تزيد أكتر يطلعوا من هدومهم و يتشافوا على الملأ و ساعتها هنفرح فيهم لأنهم هيضربوا من الأمن زينا زيهم اشمعنى احنا يعنى... وعلى رأى اللى قال (هم يضحك وهم يبكى) وشكرا
هذا ما وصلنا عبر البريد الإلكترونى من أحد قادة حركة كفاية جننتونا الجنية
وسنوافيكم بباقى الأخبار تباعا
